पशुबाट मानिसमा सर्ने रोग रोक्न मासु जाँच अनिवार्य गर्न जोड

काठमाडौं – मानिसमा सर्ने अधिकांश सङ्क्रामक रोगको स्रोत पशु हुने भएकाले स्वच्छ मासुका लागि पशु वधशाला तथा मासु जाँचसम्बन्धी कानुन कडाइका साथ कार्यान्वयन गर्नुपर्नेमा सरोकारवालाले जोड दिएका छन् ।

पशु तथा मत्स्य विकास निर्देशनालय, हेटौँडाका वरिष्ठ पशु विकास अधिकृत डा. सन्तोष घिमिरेका अनुसार मानिसमा लाग्ने सङ्क्रामक रोगमध्ये ६० प्रतिशत जुनोटिक अर्थात् पशुबाट मानिसमा सर्ने रोग रहेका छन् । हरेक वर्ष मानिसमा देखिने पाँच नयाँ रोगमध्ये तीन वटा पशुबाट उत्पत्ति हुने गरेको उनले बताए ।