कक्रोच भारतमा ठुलो आन्दोलन बन्ला?

कक्रोेच जनता पार्टी (सिजेपी) ले शनिबार नयाँ दिल्लीको जन्तरमन्तरमा ठुलो प्रदर्शन गर्‍यो । केही दिनमै दुई करोडभन्दा बढी फलोअर बनाएको ‘कक्रोेच इज ब्याक’ नामक सामाजिक सञ्जाल अभियानको आह्वानमा उल्लेख्य संख्यामा समर्थक राजधानीमा भेला भए । प्रदर्शनकारीले एक स्वरमा भारतका केन्द्रीय शिक्षामन्त्री धर्मेन्द्र प्रधानको राजीनामा माग गरे । सिजेपीले यसका लागि सरकारलाई एक साताको अल्टिमेटम दिएको छ।

यस्तो अवस्थामा प्रश्न उठेको छ– सिजेपीको आगामी बाटो के हुने छ? केही राजनीतिक विश्लेषकहरूले यसलाई अझै अपरिपक्व र स्पष्ट दिशा नभएको आन्दोलनका रूपमा हेरेका छन् । उनीहरूका अनुसार अनुभवी नेतृत्वको अभाव यो आन्दोलनको प्रमुख कमजोरी हो । तर सिजेपीले उठाएका मुद्दाप्रति सर्वसाधारणको बढ्दो आकर्षण र सहभागितालाई हेर्दा केही विश्लेषकले यसमा भविष्यको सम्भावना पनि देखेका छन्।