पुम्दीभुम्दी चिनाउन पर्वतीय दौड आयोजना हुँदै

पर्यटनको राजधानी पोखरामै रहेर पनि पुम्दीभुम्दी ओझेलमा छ । पोखरामा पर्यटकको सबैभन्दा धेरै चहलपहल हुने ठाउँ हो लेकसाईड, र त्यहि लेकसाईडको ठीक पारिपट्टि पुम्दीभुम्दी छ । तर लेकसाईडमा पर्यटक अटाईनअटाई हुँदा त्यसको ठीक पारिपट्टि रहेको पुम्दीभुम्दीमा पर्यटक कमैमात्र पुग्छन् । लेकसाईड र पुम्दीभुम्दीबीचको फरक भनेको फेवातालको वारी र पारी मात्रै हो । तालको पूर्वोत्तर क्षेत्र लेकसाईड हो भने दक्षिण पश्चिम क्षेत्र पुम्दीभुम्दी हो । तर यी दुई ठाउँमा पुग्ने पर्यटकको संख्या भने आकाश जमिनको फरक छ ।

उसो त पुम्दीभुम्दी हिमाल र तालको दृश्यावलोकनका लागि उत्कृष्ट गन्तव्य हो । त्यसमाथि शान्तिस्तुप (चाईनिज गुम्बा) र महादेवको विशाल मूर्तीले पर्यटकलाई थप आकर्षण गर्ने गरेको छ । तर त्यतिले मात्रै नपुग्ने भएपछि पोखरा पर्यटन प्रवद्र्धन केन्द्रको आयोजनामा त्यस क्षेत्रमा पर्वतीय दौड आयोजना हुँदै आएको छ ।