थारु परम्परागत संस्कृति संरक्षणमा युवा सक्रिय

तुलसीपुर–१२ रझेनीका श्याम चौधरी थारु समुदायले लगाउने कसौडी, भोटी, अंगियामा सजिएर नाचमा सहभागी थिए । २५ वर्षीय चौधरीसहितका युवा गाउँका हरेक कार्यक्रममा लुंगे नाच देखाउने तयारीमा छन् । माघीमा पनि युवाहरु नाच्ने तयारी गरेका छन् । “हामी युवाले नै अब थारु समुदायको संस्कार, संस्कृति संरक्षण गर्नुपर्छ”, उनले भने, “यो वर्षदेखि हामी आफैँ सक्रिय भएका छौँ ।”

योभन्दा पहिले सोही क्षेत्रमा युवाले थारु नाच नाच्दैनथे । परम्परागत रुपमा गरिने हरेक संस्कार, संस्कृति बिर्सिदैगएको अवस्था भएपछि यसलाई जोगाउन आफूहरु सक्रिय भएको उनले बताए । सोही ठाउँकी अस्मिता चौधरी पनि थारुको पोसाकमा सजिएकी थिइन् । युवतीहरुले पनि आफ्नै समूह बनाएर नाच गर्न थालेका छन् । “पहिले बूढापाकाले मात्रै नाच्नु हुन्थ्यो”, उनले भने, “अब हामी पनि यो नाचमा सक्रिय हुन थालेका छौँ ।”