कपिलवस्तु कांग्रेसका सहसचिव वजीह अरसदले गरे पार्टी परित्याग

कपिलवस्तु : नेपाली कांग्रेस कपिलवस्तुका जिल्ला सह–सचिव वजीह अरसदले पार्टीको साधारण सदस्यता समेत नरहने गरि पदबाट राजीनामा दिएका छन्। आज एक प्रेस वक्तव्य जारी गर्दै उनले राजीनामाको घोषणा गरेका हुन् । जिल्ला सभापति अब्दुल कलाम नेतृत्वको कार्यशैली प्रति असहमति जनाउँदै नेता अरसदले पद तथा साधारण सदस्यता त्याग गरेको घोषणा गरेका हुन्।

राजीनामापत्रमा उनले २०५५ सालदेखि नेपाल विद्यार्थी संघमार्फत राजनीतिक यात्रा सुरु गरेको उल्लेख गरेका छन्। कपिलवस्तु बहुमुखी क्याम्पसको स्वतन्त्र विद्यार्थी युनियन निर्वाचनबाट सदस्यमा निर्वाचित हुँदै राजनीतिक जीवन प्रारम्भ गरेका अरसद २०६० सालमा स्ववियु सभापतिमा निर्वाचित भएका थिए। जनआन्दोलन–२०६२ का क्रममा गिरफ्तार भएको तथा त्यसपश्चात २०६३ सालमा नेविसंघ कपिलवस्तुको जिल्ला सभापतिमा निर्वाचित भई संगठन निर्माणमा उनको सक्रिय भूमिका रहेको थियो ।