साढे दुई वर्षदेखि अलपत्र धुलो दुध कारखाना, परीक्षणमै सीमित

हेटौँडा । बागमती प्रदेश सरकारको लगानीमा निर्मित धुलो दुध कारखाना (पाउडर प्लान्ट) साढे २ वर्षदेखि अलपत्र छ । हेटौँडा–१० सिसौघारीमा बागमती सरकारले करिब ४७ करोड रुपैयाँ लगानी गरेर निर्माण गरे पनि सञ्चालनमा आउन सकेको छैन ।

सञ्चालन मोडालिटी तय गर्न ढिलाइ हुँदा करोडौँ रुपैयाँ लगानी भएको परियोजना परीक्षण उत्पादनमै सीमित बनेको छ । प्रदेश सरकारले दुध उत्पादन बढी हुने समयमा किसानले भोग्ने ‘मिल्क होलिडे’ समस्या समाधान गर्ने, अतिरिक्त दुधलाई धुलो तथा बटरमा रुपान्तरण गरेर बजार व्यवस्थापन सहज बनाउने र दुग्धजन्य उत्पादनमा मूल्य अभिवृद्धि गर्ने उद्देश्यले उद्योग स्थापना गरेको थियो ।