हलो र डोकोबाट हलीको संघर्ष चित्रण

आगामी साउन २२ गते रिलिजमा आउने फिल्म हलीको तेस्रो पोस्टर सार्वजनिक गरिएको छ। जापुरा फिल्म्स् प्रोडक्सन र शुभ चिरायू फिल्म्स्को सहकार्यमा व्यवसायीद्वय पूजा गुरुङ र जश्मिन श्रेष्ठद्वारा निर्मित फिल्मले ग्रामीण श्रमजीवी वर्गको कथा र सामाजिक रूपान्तरणको सन्देशलाई केन्द्रमा राखेको छ।

सार्वजनिक पोस्टरले सामाजिक भावलाई दृश्यात्मक रूपमा प्रस्तुत गरेको छ। पोस्टरमा काँधमा हलो बोकेका एक पुरुष र नाम्लो–डोको बोकेर गम्भीर मुद्रामा रहेकी एक महिलालाई केन्द्रमा राखिएको छ। पृष्ठभूमिमा पहाडी भेगको परम्परागत ढुंगे घर र ढोकाबाट बाहिर चियाइरहेकी एक महिलाको आकृति प्रस्तुत गरिएको छ। पोस्टरले नेपाली ग्रामीण जीवन, कृषि संस्कार र श्रमस“ग जोडिएको संघर्ष झल्काउने प्रयास गरेको छ। फिल्मको कथा वास्तविक जीवनका घटनाबाट प्रेरित रहेको निर्माण पक्षले जनाएको छ। फिल्मले समाज र देशमा परिवर्तन ल्याउनका लागि एक जना हली श्रमजीवी नै पर्याप्त हुन सक्छ भन्ने सन्देश दिन खोजेको छ।