मनाङ–मनास्लुका पर्यटक एबिसीतिर, सडक खुलेपछि बढ्यो चहलपहल

काठमाडौं – बाढीपहिरोले अन्य हिमाली पदयात्रा मार्ग प्रभावित बनाएपछि अन्नपूर्ण आधार शिविर (एबिसी) अहिले पर्यटकको वैकल्पिक गन्तव्य बन्न थालेको छ । अन्नपूर्ण क्षेत्रमा अवरुद्ध सडक र पदमार्ग सञ्चालनमा आएपछि पछिल्ला दिनमा एबिसी जाने विदेशी पर्यटकको सङ्ख्या उल्लेख्य रूपमा बढेको छ ।

छोम्रोङ पर्यटन व्यवस्थापन समितिका सचिव दिलीप गुरुङका अनुसार अहिले दैनिक करिब ३०० पर्यटक अन्नपूर्ण आधार शिविर पुगिरहेका छन् । यसमा विदेशी तथा सार्क राष्ट्रका पर्यटकको सङ्ख्या बढी छ । निरन्तरको वर्षा रोकिएर मौसममा सुधार आउनु र मनाङ तथा मनास्लु क्षेत्रका कतिपय पदमार्ग अझै प्रभावित रहनुले पनि पर्यटकको गन्तव्य एबिसीतर्फ मोडिएको उनले बताए ।