अस्थायी टहरा बनाउन जनशक्ति अभाव

रुकुम पश्चिम — सानीभेरी गाउँपालिका–४ गोलचौरकी डम्बरा विक भूकम्पले भत्किएको आफ्नो घरछेउमा अस्थायी टहरा बनाउने सुर कसेको धेरै भयो । तर केही मेसो आएको छैन । कारण हो, काममा सघाउने मान्छेको अभाव । उनका श्रीमान् वैदेशिक रोजगारीमा छन् ।

आफूलाई घरमा ८ वर्षकी छोरी र ३ वर्षको छोरा हेर्नै ठिक्क हुँदा काममा सघाउने मान्छे छैन । ‘उताबाट पैसा त पठाउनुभएको छ । पैसा दिएर पनि काममा लगाउने मान्छे पाइन्न,’ उनले भनिन् ।