विश्वकै ठूलो एआई र रोबोटिक्स प्रतियोगितामा नेपाली विद्यार्थी चम्किए

आर्टिफिसियल इन्टेलिजेन्स, कोडिङ र रोबोटिक्सको क्षेत्रमा विश्वकै सबैभन्दा ठूलो वार्षिक प्रतियोगिता ‘कोडेभर ७.०’मा नेपाली विद्यार्थीहरूले अभूतपूर्व सफलता हासिल गरेका छन्। इन्डोनेसियाको जकार्तास्थित बिनुस विश्वविद्यालयमा गत मे १६ र १७, २०२६ मा सम्पन्न अन्तर्राष्ट्रिय फाइनलमा नेपालका ९ वटा टोलीले उत्कृष्ट प्रदर्शन गरेका हुन्।

७० भन्दा बढी देशका प्रतिस्पर्धी युवा नवप्रवर्तकहरूलाई पछि पार्दै नेपाली विद्यार्थीहरूले ६ वटा प्रतिष्ठित अन्तर्राष्ट्रिय अवार्ड जित्न सफल भए भने थप तीनवटा टोलीले विश्वकै शीर्ष ३० भित्र स्थान सुरक्षित गरे। ७ देखि १८ वर्ष उमेर समूहका विद्यार्थीहरूका लागि फ्युचर स्किल्सद्वारा आयोजित यो प्रतियोगिता संयुक्त राष्ट्रसङ्घको दिगो विकास लक्ष्यसँग आबद्ध रही वास्तविक जीवनका समस्याहरू समाधान गर्ने प्रविधि निर्माणमा केन्द्रित रहेको थियो।