किन पठाइयो दीपक भट्टलाई नख्खुबाट सिन्धुपाल्चोक कारागार ?

विभिन्न आर्थिक कसुरसम्बन्धी मुद्दामा पुर्पक्षका लागि थुनामा रहेका व्यवसायी दीपक भट्टलाई नख्खु कारागारबाट सिन्धुपाल्चोक स्थानान्तरण गरिएको छ। कारागार व्यवस्थापन विभागको निर्देशनपछि शनिबार साँझ उनलाई उपत्यकाबाहिर पठाइएको हो।

नख्खु कारागार प्रशासनका अनुसार विभागबाट स्थानान्तरणसम्बन्धी पत्र प्राप्त भएपछि आवश्यक प्रक्रिया पूरा गरी भट्टलाई सिन्धुपाल्चोक पठाइएको हो। प्रशासनले यसलाई विभागबाट हुने नियमित सरुवाको प्रक्रिया भने पनि भट्टलाई नै सिन्धुपाल्चोक पठाउनुपर्ने कारणबारे थप विवरण सार्वजनिक गरेको छैन।