यार्सागुम्बा टिप्न गर्भवती पनि भाज्यो लेकमा

गोरखा : चुमनुब्री—७ लारकी एक गर्भवती महिला भाज्यो लेकमा यार्सागुम्बा संकलन गर्दागर्दै सुत्केरी हुने दिन नजिकियो। उनी लेकबाट ६ घण्टा पैदल हिँडेर छेकम्पार बर्थिङ सेन्टरमा झरिन्। केही दिनमा सुत्केरी भइन्। अहिले घरमा स्वास्थ्य लाभ गरिरहेकी छिन्।

त्यसको केही दिनपछि अरू दुई गर्भवती महिला पनि यार्सागुम्बा संकलन गर्न गएको लेकबाट गर्भ परीक्षण गर्न स्वास्थ्यचौकी आए। परीक्षण गराएर फेरि लेकमै फर्किए।यतिबेला चुमनुब्री—७ का विभिन्न गाउँबस्तीबाट गाउँलेहरू यार्सागुम्बा संकलन गर्न तिब्बती सिमाना आसपासका लेकमा पुगेका छन्। समुद्री सतहबाट चार हजार मिटरभन्दा माथिल्लो क्षेत्रमा गाउँबाट एकदिनको बाटो पैदल हिँडेर गर्भवतीसमेत लेकलेकमा पुगेका वडाध्यक्ष टासी दोर्जे बताउँछन्।