इरानमा इजरायलको आक्रमण, तेहरान र इसफाहानमा शक्तिशाली विस्फोट

काठमाडौं । इजरायली सेनाले फेरि इरानमाथि आक्रमण गरेको छ । योसँगै इरानको राजधानी तेहरानसहित तब्रिज र इसफाहान सहरमा शक्तिशाली विस्फोट भएको छ ।

इरानले यसअघि उत्तरी इजरायलतर्फ क्षेप्यास्त्रको वर्षा गरेको थियो । त्यसपछि इजरायलले बमबारी गरेको हो ।

लेबनानमाथि आक्रमण गरेर इजरायलले युद्धविरामको बारम्बार उल्लंघन गरेको इरानले आरोप लगाउँदै आएको थियो ।

इजरायली सेनाले सामाजिक सञ्जाल एक्समा भनेको छ, “इजरायली सेना उच्च सतर्कतामा छ र इजरायल राज्यलाई खतरा उत्पन्न गर्ने जोसुकैविरुद्ध आवश्यक परे सबै क्षेत्रमा कारबाही जारी राख्न तयार छ ।”

इजरायलको आक्रमणपछि अन्तर्राष्ट्रिय बजारमा कच्चा तेलको मूल्य उकालो लागेको छ । आक्रमणको खबर सार्वजनिक भएको एक घण्टाभित्रै अन्तर्राष्ट्रिय बेन्चमार्क ब्रेन्ट क्रुडको मूल्य ३.६३ प्रतिशतले बढेर प्रतिब्यारेल ९६.७५ डलर पुगेको छ ।

यस्तै, वेस्ट टेक्सास इन्टरमिडिएटको मूल्य पनि ३.३५ प्रतिशतले वृद्धि भई प्रतिब्यारेल ९३.८९ डलर पुगेको छ ।

इजरायली आक्रमणपछि इरानी रेड क्रिसेन्ट ‘हाई अलर्ट’मा

इरानी रेड क्रिसेन्टले देशभर इजरायली आक्रमणबाट उत्पन्न हुन सक्ने कुनै पनि परिस्थितिको सामना गर्न आफू पूर्ण तयारी अवस्थामा रहेको जनाएको छ ।

उसले एक्समा जारी गरेको विज्ञप्तिमा भनेको छ, “आज बिहान इरानमाथि भएको इजरायली हवाई आक्रमणपछि इरानी रेड क्रिसेन्टका द्रुत प्रतिक्रिया टोलीहरू लजिस्टिक, राहत तथा औषधि सेवासहितका चिकित्सा सुविधा लिएर उच्च सतर्कतामा परिचालित भएका छन् र प्रभावित नागरिकलाई सेवा प्रदान गरिरहेका छन् ।”

रेड क्रिसेन्टले सर्वसाधारणलाई प्राथमिक उपचार सामग्री तयार राख्न तथा कुनै पनि प्रभावित क्षेत्रबाट कम्तीमा १०० मिटर टाढा रहन आग्रह गरेको छ ।

#आक्रमण

#इजरायल

#विस्फोट

#इरान