विवादित खेलकुद सदस्य सचिव शर्मालाई गण्डकीका मुख्यमन्त्रीको संरक्षण

विवादित गण्डकी खेलकुद परिषद्का सदस्य सचिव श्रीधर शर्मालाई मुख्यमन्त्री सुरेन्द्रराज पाण्डेको संरक्षण रहेको आरोप लागेको छ। छानबिन प्रतिवेदनले कारबाहीका लागि सिफारिस गर्नुका साथै प्रदेशको न्यायाधिवक्ताको कार्यालयले समेत कारबाहीका लागि राय दिए पनि मुख्यमन्त्री पाण्डेको अनिच्छाका कारण सदस्य सचिव शर्मामाथिको कारबाही प्रक्रिया अघि बढ्न नसकेको बताइएको छ।

सदस्य सचिव शर्माको योजनामा खेलकुदमा चरम लापरबाही गर्दै मिलेमतोमा पद वितरण गरेको सार्वजनिक भएपछि त्यसको छानबिन गर्न गण्डकी प्रदेश सामाजिक विकास, युवा तथा खेलकुद मन्त्रालयले तत्कालीन सचिव शेषनारायण पौडेलको संयोजकत्वमा तीन सदस्यीय छानबिन समिति गठन गरेको थियो। समितिले चरम लापरबाहीसहित मिलेमतोमा पद वितरण भएको निष्कर्ष निकाल्दै कारबाहीका लागि सुझाव दिएको थियो।