शिक्षा मन्त्रालयले शिक्षा सुधार र शिक्षक व्यवस्थापनमा के गर्दैछ?

काठमाडौँ- सरकारले आगामी आर्थिक वर्षदेखि विद्यालय शिक्षा प्रणालीमा संरचनागत सुधारको कार्यक्रम अघि बढाउने भएको छ। शिक्षा क्षेत्रको बजेट तथा कार्यक्रममा समावेश गरिएका व्यवस्थाअनुसार विद्यालय म्यापिङ, पूर्वाधार अडिट, शिक्षक क्षमता परीक्षण, राष्ट्रिय योग्यता ढाँचा कार्यान्वयन तथा पूर्व सिकाइको मान्यतालगायतका कार्यक्रम सञ्चालन गरिने तयारी गरिएको स्रोतले जनाएको छ।

शिक्षा मन्त्रालय स्रोतका अनुसार विद्यालयको भौतिक पूर्वाधार, जनशक्ति, पाठ्यक्रम, शिक्षण विधि, परीक्षा प्रणाली तथा व्यवस्थापनका पक्षहरूको पुनरावलोकन गरी विद्यालय शिक्षालाई समयानुकूल र आधुनिक बनाउने लक्ष्य राखिएको छ। त्यसका लागि देशभरका सामुदायिक विद्यालयहरूको अवस्था अध्ययन गरी आवश्यक सुधारका योजना तयार गरिनेछ।