रोमानियामा रेलको ठक्करबाट दुई नेपालीको मृत्यु

युरोपेली मुलुक रोमानियामा रेलको ठक्करबाट दुई नेपाली नागरिकको मृत्यु भएको छ। दुर्घटनामा सिन्धुपाल्चोकको त्रिपुरासुन्दरी गाउँपालिका ५ का ३६ वर्षीय शान्तकुमार श्रेष्ठ र चितवनको भरतपुर महानगरपालिका २० का २५ वर्षीय निश्चल तामाङको ज्यान गएको हो।

स्थानीय सञ्चारमाध्यमका अनुसार दुर्घटना रोमानियाको राजधानी बुखारेस्टबाट करिब ३०८ किलोमिटर उत्तरपूर्वमा रहेको बाकाउ सहरको चिमिई रेलमार्गमा आइतबार स्थानीय समयअनुसार बिहान ३ः२१ बजे भएको थियो। रेलको ठक्करबाट दुवै जनाको घटनास्थलमै मृत्यु भएको जनाइएको छ।