सुदूरपश्चिम प्रदेशका मुख्यमन्त्रीले भेटे सभापति थापालाई

काठमाडौं । नेपाली कांग्रेसका सभापति गगन थापा र सुदूरपश्चिम प्रदेशका मुख्यमन्त्री कमलबहादुर शाहबीच भेटवार्ता भएको छ । शुक्रबार (जेठ १) बिहान पार्टी केन्द्रीय कार्यालय सानेपामा उनीहरूबीच भेटवार्ता भएको कांग्रेस प्रवक्ता देवराज चालिसेले जानकारी दिए ।

प्रदेशको सत्तासमीकरण फेरबदल गर्ने तयारी भइरहेका बेला भएको यो भेटलाई अर्थपूर्ण रूपमा हेरिएको छ । सुदूरपश्चिम सरकारको नेतृत्व कांग्रेसले गरिरहेको छ ।

“प्रदेशमा सत्तासमीकरण फेरबदलका लागि हाम्रो घनीभूत छलफल भइरहेको छ । सोहीअनुसार भेट भएको हो,” उनले बाह्रखरीसित भने, “यसमा नेपाली कांग्रेस, नेकपा (एमाले) मात्रै हैन, अन्य दलको भूमिकाका बारेमा पनि कुराकानी भइरहेको छ ।”

प्रदेश सरकारको नेतृत्व नेपाली कम्युनिस्ट पार्टी (नेकपा)को भागमा पनि पर्न सक्ने उनले संकेत गरे । “सबै दलको प्रतिनिधित्व छ, हाम्रो मात्रै छैन,” उनले भने, “अन्य दलहरूको पनि ख्याल गर्नुपर्‍यो ।”

नेकपा (एमाले)का अध्यक्ष केपी शर्मा ओलीसँग प्रदेशगत समीकरण हेरफेरलगायत विषयमा कांग्रेस सभापति थापाले यसअघि छलफल गरिसकेका छन् । उनले नेकपाका संयोजक पुष्पकमल दाहाल ‘प्रचण्ड’सँग पनि भेटवार्ता गरिसकेका छन् ।

ओली र थापाबीच अब फेरि हुने भेट निर्णायक बन्ने प्रवक्ता चालिसेको भनाइ छ ।

#नेपाली कांग्रेस

#गगन थापा

#कमलबहादुर शाह

#सत्तासमीकरण