बेलायतले विदेशी कामदारका लागि न्यूनतम तलब बढाउन लागेको हो ?

लन्डन । युरोपेली सङ्घबाट बेलायतको बहिर्गमन अर्थात् ब्रेक्जिटपछि विदेशी कामदार पलायन बेलायतको सबैभन्दा ठुलो टाउको दुखाई बनेको छ । यस्तोमा आप्रवासी कामदारहरूलाई टिकाइराख्न र उनीहरूको पलायन रोक्न बेलायतले विदेशी कामदारलाई दिँदै आएको न्यूनतम तलब बढाएर ३० हजार पाउन्डमाथि पुर्याउन खोजिरहेको छ ।

यसको आधिकारिक घोषणा यही हप्ताभित्र हुन सक्ने अपेक्षा गरिएको छ । तलबमा सुधारको यो योजनाबारे अहिले छलफल चलिरहेको भन्दै टेलिग्राफले समाचार छापेको छ । अहिले कर्मचारी अभाव भएका पेसामा रहेका क्षेत्रबाहिर कामदारहरूको न्यूनतम तलब २६ हजार २०० पाउन्डसम्म छ । यो भनेको बेलायतको औसत तलब भन्दा कम हो । अहिले बेलायतमा औसत तलब ३३ हजार पाउन्ड छ । प्रस्तावित संशोधनलाई अन्तिम रूप दिन बाँकी नै छ ।