राष्ट्रिय गौरव आयोजनाको प्रगति निकै सुस्त

काठमाडौं । राष्ट्रिय गौरव आयोजनाको भौतिक प्रगति निकै सुस्त देखिएको छ । महालेखाको ६३ औँ प्रतिवेदनका अनुसार अधिकांश आयोजनाको प्रगति निकै सुस्त देखिएको हो ।

माथिल्लो तामाकोसी जलविद्युत आयोजना, गौतमबुद्ध अन्तर्राष्ट्रिय विमानस्थल र पोखरा क्षेत्रीय अन्तर्राष्ट्रिय आयोजनाको काम सकिएको छ ।

बाँकी २४ आयोजनाको काम अझै बाँकी छ । मेलम्ची खानेपानी आयोजनाको पहिलो चरणको अधिकांश काम पनि सम्पन्न भइसकेको र दोस्रो चरणको काम १२.४७ प्रतिशत सकिएको प्रतिवेदनमा उल्लेख छ ।

आर्थिक वर्ष २०८१/८२ सम्ममा राष्ट्रिय गौरवका २७ आयोजनामध्ये १७ आयोजनालाई उच्च प्राथमिकतामा राखेर कार्यान्वयन भइरहेको उल्लेख छ ।

सरकारले सार्वजनिक गरेको तथ्यांकअनुसार पुष्पलाल (मध्यपहाडी) लोकमार्ग आयोजनाको भौतिक प्रगति करिब ८१.७३ प्रतिशत पुगेको छ ।

काठमाडौं–तराई/मधेस द्रुतमार्गको प्रगति करिब ४२.१३ प्रतिशत रहेको छ । हुलाकी राजमार्ग आयोजनाको प्रगति ७२.७५ प्रतिशत पुगेको छ । सिक्टा सिँचाइ आयोजनामा करिब ४४.२३ प्रतिशत काम सम्पन्न भएको उल्लेख गरिएको छ ।

त्यसैगरी भेरी–बबई डाइभर्सन आयोजनाको प्रगति करिब ६९ प्रतिशत पुगेको छ । रानीजमरा कुलरिया सिँचाइ आयोजनाको प्रगति ७४.७६ प्रतिशत रहेको छ ।

बबई सिँचाइ आयोजनामा ८२.२७ प्रतिशत प्रगति हासिल भएको महालेखाको प्रतिवेदनमा उल्लेख छ । महाकाली सिँचाइ आयोजनाको प्रगति २६.६५ प्रतिशत रहेको छ ।

ऊर्जा तथा प्रसारण क्षेत्रतर्फ राष्ट्रिय प्रसारण ग्रिड विस्तार आयोजनाको प्रगति करिब ११.२७ प्रतिशत पुगेको छ । राष्ट्रपति चुरे संरक्षण कार्यक्रमको प्रगति करिब ६.३९ प्रतिशत पुगेको प्रतिवेदनमा उल्लेख छ ।

कर्णाली कोरिडोर (खुलालु–हिल्सा–सिमिकोट–सलिसल्ला) प्रगति २०.७५ प्रतिशत मात्रै सकिएको छ । कोसी कोरिडोर (खाँदबारी–किमाथांका) सडक आयोजनाको प्रगति जम्मा ४५ प्रतिशत सकिएको छ । कालीगण्डकी कोरिडोर (गैंडाकोट कोरला सडक खण्ड)को काम ८२.४३ प्रतिशत सकिएको छ ।

बूढीगण्डकी जलविद्युत् आयोजनाको काम १६.५५ प्रतिशत सकिएको छ । पश्चिम सेती आयोजनाको काम सुरु भएको छैन । पशुपति क्षेत्र विकास कोषको काम ७८ प्रतिशत सकिएको छ । लुम्बिनी विकास कोषको काम ८९ प्रतिशत सकिएको छ ।

रेल, मेट्रो रेल तथा मोनो रेल विकास आयोजना काम सुरु भएको छैन । निजगढ अन्तर्राष्ट्रिय विमानस्थल आयोजना अझै प्रारम्भिक चरणमै रहेको छ । केही रेलमार्ग तथा जलविद्युत आयोजना अपेक्षाकृत सुस्त गतिमा अघि बढिरहेको तथ्यांकले देखाएको छ।

#राष्ट्रिय गौरवका आयोजना

#महालेखा