पोखराका मेयर धनराजको ४३ करोडको सम्पत्ति, पोखरा र काठमाडौंमा ४ ओटा घर

साउन ५, कास्की । पोखरा महानगरपालिकाका मेयर धनराज आचार्यले सम्पत्ति विवरण सार्वजनिक गरेका छन् । उनले पोखरा महानगरपालिकाको मेयर पदमा निर्वाचित भएको दुई महिनापछि चल, अचल र जिन्सीसहितको ४३ करोड ६१ लाख ४५ हजार ४५ हजार ६१६ रूपैयाँ बराबरको सम्पत्ति र दुई करोड ८५ लाख रूपैयाँ ऋण रहेको विवरण सार्वजनिक गरेका हुन् ।

उनले बैंक, वित्तीय कोष र नातेदारसँग ऋण लिएको उल्लेख गरेका छन् । ऋण घटाउँदा उनीसँग खुद सम्पत्ति ४० करोड ७६ लाख ४५ हजार रूपैयाँ रहेको सम्पत्ति विवरणमा उल्लेख गरिएको छ । मेयर आचार्यले बैंक तथा वित्तीय संस्थालगायत विभिन्न कम्पनीमा २५ करोड ९९ लाख ४५ हजार ६१६ रूपैयाँ शेयर र लगानी गरेको विवरणमा उल्लेख छ । उनको कास्कीको मादीमा निर्माणाधीन सुपर मादी हाइड्रो र हेवाखोला हाइड्रोपावरमा शेयर रहेको छ । यसैगरी, तमोर जलविद्युत आयोजना, मेगा बैंक र सिटी डेभलपमेन्ट बैंकमा उनको संस्थापक शेयर रहेको छ ।