जेनजी विद्रोहपछि फेरि द्वन्द्व भड्काउन खोज्ने तत्त्वहरूबाट सचेत रहौँ

जेनजी विद्रोह कुनै नियोजित घटना थियो कि थिएन भन्ने विस्तारै खुल्दै जाला । तर भदौ २३ र २४ गतेका दुई दिनमै नेपालमा यस्ता भयानक दृश्य देखिए र यति ठूलो परिवर्तन ल्याइदियो कि त्यसले विश्वलाई नै चकित पारेको छ । यही कारण नेपाल अहिले एउटा असामान्य राजनीतिक अवस्थाबाट गुज्रिरहेको छ ।

जेनजी आन्दोलनका क्रममा भदौ २३ गतेको प्रदर्शन र २४ गतेको व्यापक हिंसापछि तत्कालीन प्रधानमन्त्री केपी शर्मा ओली नेतृत्वको निर्वाचित सरकार विस्थापित भयो । संसद् विघटन भयो र पूर्वप्रधानन्यायाधीश सुशीला कार्कीको नेतृत्वमा अन्तरिम सरकार गठन भयो । छ महिनापछि नयाँ निर्वाचनको घोषणा भइसकेको छ । यस घटनाक्रमले मुलुकलाई लोकतान्त्रिक मार्गमा फर्काउने वा अझै गहिरो अस्थिरतामा धकेल्ने दुवै सम्भावना देखाइरहेको छ ।