‘जुगल भ्रमण वर्ष २०८३’ को तयारी तीव्र

प्राकृतिक, धार्मिक, सांस्कृतिक तथा ऐतिहासिक पर्यटकीय स्थलको पहिचान, संरक्षण, प्रवर्द्धन र प्रचारप्रसार गरी बाह्य तथा आन्तरिक पर्यटक आकर्षित गर्न जुगल गाउँपालिकाले ‘जुगल भ्रमण वर्ष २०८३’ को तयारी तीव्र पारेको छ।

गाउँपालिकामा प्रसिद्ध जुगल हिमालसहित दर्जनौँ हिमशृङ्खला, डल्ले पोखरी, घिच्चे झरना, स्यावल पोखरी, अमिलो पानी, खस्रे पार्क, दोमोङ पोखरीलगायतका पर्यटकीय स्थल छन्। ती पर्यटकीय स्थललाई विश्वमाझ प्रचारप्रसार गरी बाह्य तथा आन्तरिक पर्यटक भित्र्याउन ‘जुगल भ्रमण वर्ष २०८३’ मनाउन लागिएको गाउँपालिकाका अध्यक्ष रेशम स्याङ्बोले जानकारी दिनुभयो।