विमानस्थल निर्माणमा हालसम्म झण्डै २० करोड रुपैयाँ खर्च , सम्पन्न हुन नसक्दा स्थानीयको प्लेन चढेर काठमाडौं जाने सपना अधुरै

२०७३ असार १३ गते पहिलो चरणमा शिलान्यास भएको अर्घा भगवती विमानस्थल परियोजना आठ वर्षसम्म पनि निर्माण सम्पन्न हुन नसक्दा स्थानीयको प्लेन चढेर काठमाडौं जाने सपना अधुरै रहेको छ । तत्कालीन उपप्रधानमन्त्री टोपबहादुर रायमाझीले शिलान्यास गर्नुभएको उक्त विमानस्थल निर्माणमा हालसम्म झण्डै २० करोड रुपैयाँ खर्च भइसकेको छ । तर, कच्ची धावनमार्गबाहेक अन्य पूर्वाधार बन्न सकेको छैन ।

विमानस्थल छिटो बनाउने भन्दै रायमाझीले पटक-पटक कामको औपचारिक शिलान्यास गरिसक्नुभएको छ । २०७३ मा शिलान्यास भए पनि काम सुरु नभएपछि उहाँले फेरि २०७६ मा निकै धुमधामका साथ स्थानीयलाई जम्मा गरेर विमानस्थल निर्माणको काम सुरु गर्नुभएको थियो । विमानस्थलको धेरै संरचना हालसम्म पनि बनिसकेको छैन । सन्धिखर्क नगरपालिका-१० धरमपानीको शिखरबार्नीमा अर्घा भगवती विमानस्थल बन्दैछ । आयोजनाको प्रगति भने ७० प्रतिशत पुगेको आयोजनाले दाबी गरेको छ ।