सरकारले भुक्तानी नदिँदा आर्थिक दबाब बढेको निर्माण व्यवसायीको गुनासो

काठमाडौँ — सरकारले भुक्तानी गर्नुपर्ने रकम सयममै उपलब्ध नगराउँदा आफूहरूलाई समस्यामाथि समस्या थपिएको निर्माण व्यवसायीले गुनासो गरेका छन् । निर्माण व्यवसायीलाई सरकारले ६० अर्ब रुपैयाँ भुक्तानी गर्न बाँकी रहे पनि आनाकानी गरिरहेको उनीहरूको भनाइ छ । जसकारण आफूहरूमाथि आर्थिक दबाब बढेको र कतिपय व्यवसायी आत्महत्याको स्थितिमा समेत पुगेको नेपाल निर्माण व्यवसायी महासंघले जनाएको छ ।

यही असार १५ मा डडेलधुरा, अमरगढी नगरपालिका–५ का निर्माण व्यवसायी डम्बरदत्त भट्टले आत्महत्या गर्नुको पछाडि सरकार दोषी रहेको महासंघको आरोप छ । ‘सरकारले दिने रकम समयमा भुक्तानी नहुँदा व्यवसायीलाई आर्थिक दबाब भइरहेको छ,’ महासंघका अध्यक्ष रवि सिंहले भने, ‘यो झेल्न नसकेर ती व्यवसायीले आत्महत्याको बाटो रोज्नुपर्ने अवस्था आयो ।’