रुसको प्रयोगशालामा फैलिएको भनिएको 'प्लेग निमोनिया' के हो, के यो कोभिड–१९ जस्तै फैलिन सक्छ?

काठमाडौं– रुसको साइबेरियास्थित इरकुत्स्क एन्टी–प्लेग अनुसन्धान संस्थानकी एक महिला प्रयोगशाला कर्मचारीको गम्भीर निमोनियापछि मृत्यु भएपछि न्युमोनिक प्लेगको आशंकाले विश्वको ध्यान तानेको छ। घटनापछि करिब २०० जनालाई चिकित्सकीय निगरानीमा राखिएको छ। तर अहिलेसम्म रुसी स्वास्थ्य अधिकारीहरूले ती महिलाको मृत्यु प्लेगकै कारण भएको पुष्टि गरेका छैनन्। रुसको रोस्पोत्रेबनादजोरले उनको मृत्यु ‘अज्ञात कारणको निमोनिया’ भएको र संस्थानमा कामसँग सम्बन्धित कुनै रोगजनक भेटिएको पुष्टि नभएको जनाएको छ।

घटनासँगै सामाजिक सञ्जाल र केही सञ्चारमाध्यममा प्रयोगशालामा प्लेगको जीवाणु बोकेको टेस्ट ट्युब फुटेर संक्रमण भएको दाबी आएका छन्। तर यो विवरण पनि स्वतन्त्र रूपमा पुष्टि भइसकेको छैन। त्यसैले अहिलेको अवस्थालाई ‘रुसमा प्लेग फैलियो’ भन्नुभन्दा न्युमोनिक प्लेगको सम्भावित घटनाको अनुसन्धान भइरहेको अवस्था भन्नु वैज्ञानिक रूपमा बढी उचित हुन्छ। रुसी अधिकारीहरूले सम्पर्कमा आएका व्यक्तिहरूलाई निगरानीमा राख्नु र प्रयोगशाला तथा अस्पतालमा जैवसुरक्षा उपाय बढाउनु भने सावधानीका कदम हुन्।