डा अर्जुनदेव भट्ट मेरा लागि पुनर्जीवनदायी आमा सरह : खगेन्द्र संग्रौला

डाक्टर अर्जुनदेव भट्ट एक अर्थमा मेरा लागि पुनर्जीवनदायी आमा सरह हुनुहुन्छ। प्रोस्टेटको अपरेशन तीन-तीन पटक असफल भई म निकै अत्यासको मनोदशामा थिएँ । हप्तैपिच्छे, अझ कहिले त दिनैपिच्छे, क्याथेटर वा पाइप प्रयोग गरी मूत्रत्याग गर्नुपर्ने दुरवस्थामा म पीडित थिएँ । सुखद् संयोगवश डाक्टर भट्टको ममतामयी तीक्ष्ण दृष्टि र कुशल हातको शल्यक्रिया नपाएको भए म सायद इन्फेक्सनले अस्ति नै मरिसक्थेँ । म आजसम्म सिर्जनात्मक क्रियाशीलता साथ जीवित रहनुमा डाक्टर भट्टद्वारा प्रदत्त पुनर्जीवनको हात छ।

डाक्टर भट्ट र मेरो जन्म मिति रहेछ केवल एक वर्ष अघिपछि । डा भट्टले मेरो शल्यक्रिया गर्ने कुरा भएपछि मलाई लाग्यो- म जस्तै बुढो मान्छे। शल्यक्रिया गर्ने छुरा ठाउँमा नभएर अन्त पुगे के हुन्छ? मेरा मित्रहरु पत्रकार विजयकुमार पाण्डे र जुगल भुर्तेलले एकचौटी गरिहेर्न आग्हर गरे। 'म जस्तै बुढो मान्छे' भन्ने मेरो आशयमा उनीहरुको जोडबल थियो- बुणा भएपनि तगडा छन्।