ढुंगेदेउरालीले जित्यो लामाचौर कप

पोखरा । रारा लामाचौर कप खुला पुरुष भलिबल प्रतियोगिताको उपाधि ढुंगेदेउराली क्लबले जितेको छ । नवआदर्श सामुदायिक विकास समाजको आयोजनामा मंगलबार फाइनलमा जिएम समाज कावासोतीलाई ३–२ सेटमा पराजित गर्दै उपाधिसहित नगद ३ लाख जितेको हो । उपविजेताले १ लाख ५० हजार प्राप्त गरेको छ ।

खचाखच दर्शकमाझ अत्यन्तै प्रतिस्पर्धात्मक खेलमा ढुंगेदेउरालीले २२–२५, २५–१८, २५–२७, २६–२४ र १५–१२ सेटले उपाधिमा कब्जा जमाउन सफल भएको हो । चौथो सेट २४–२४ को रोमाञ्चक मोडमा पुगेकोमा सञ्जुविक्रम शाह कप्तानीको ढुंगेदेउरालीले विपक्षीलाई रोकेको थियो ।