गगनलाई लक्षित गर्दै किशोरसिंहले भने– ठूला कुरा गर्नुपर्दैन, पार्टी भित्तामा पुगिसक्यो

२० असोज, काठमाडौं । नेपाली कांग्रेसको सभापतिका उम्मेदवार किशोरसिंह राठौरले अहिलेकै अवस्थामा कांग्रेसलाई उठाउन निकै गाह्रो रहेको बताएका छन् । हिमालय टीभीको यक्षप्रश्नमा पत्रकार निमेष बञ्जाडेसँग कुराकानी गर्दै राठौरले पार्टी एकताबिना कांग्रेस निकै कठिन अवस्थामा पुग्ने दाबी गरेका हुन् ।

‘यही पार्टीलाई उठाउन गाह्रो छ । यहाँ जतिसुकै हल्ला, ठूला कुरा गरेर हुँदैन । हामीलाई राष्ट्रिय स्वतन्त्र पार्टीले भित्तामा पुर्‍याइसक्यो,’ सभापति गगन थापालाई लक्षित गर्दै राठौरले भने, ‘कम्युनिस्टहरू मिल्दैछन्, अझ भित्तामा जान्छ । कांग्रेस पार्टी फुट्दैछ, अझ भित्तामा जान्छ ।’