पूर्वराजा ज्ञानेन्द्रसँग दूरी बढिरहेका बेला जब लिङ्देन दौरा–सुरुवालविना भेट्न पुगे

अघिल्लो मंसिर (२०७८) सम्मपनि राप्रपाका तत्कालीन अध्यक्ष कमल थापामा राजतन्त्र र पूर्वराजा ज्ञानेन्द्र शाहप्रति कुनै विरक्तिभाव थिएन। २०६३ मा लोकतन्त्र स्थापनापछिको गणतन्त्रको लहरसँगै राजतन्त्रका लागि प्रतिकूल स्थितिमा समेत थापाले पूर्वराजा शाह र राजतन्त्रलाई काँध थापी हिँडिरहे।

निर्मल निवासको सहयोगमा राजेन्द्र लिङ्देनले २०७८ मंसिरमा सम्पन्न महाधिवेशनमा जब थापालाई अध्यक्षमा पराजित गरे, त्यसपछि थापा र पूर्वराजाबीचको राजनीतिक सम्बन्ध टुट्यो। आफूविरुद्ध निर्मल निवासबाटै षडयन्त्र भएको आरोप लगाउँदै थापाले १५ वर्षदेखि उठाउँदै आएको राजतन्त्र पुनस्र्थापनाको एजेण्डा परित्याग गरे।