सुदूरपश्चिम प्रदेशमा क्रिकेट खेलाडी टिकाउन प्रयास, क्रिकेट खेलाडीलाई तलब दिने तयारी

सुदूरपश्चिम प्रदेशमा क्रिकेट खेलाडी टिकाउन प्रयास थालिएको छ। सुदूरपश्चिम प्रादेशिक क्रिकेट संघले क्रिकेट खेलाडीहरू विभागीय टोलीमा जाने लहर नै चलेपछि उक्त समस्या समाधानका लागि पहल थालेको हो।

प्रादेशिक क्रिकेट संघका अध्यक्ष बासुदेव जोशीले प्रदेशका १० जना उत्कृष्ट महिला तथा पुरुष क्रिकेट खेलाडीलाई मासिक तलब दिने तयारी भएको बताए। ‘केही प्रतियोगिता प्रदेशको प्रतिनिधित्व गरेर खेलेपछि अधिकांश क्रिकेट खेलाडी विभागीय टोलीमा जाने लहर नै छ,’ अध्यक्ष जोशीले भने, ‘उक्त समस्या समाधानका लागि र उत्कृष्ट खेलाडीलाई पनि सुदूरपश्चिम प्रदेशबाटै खेलाउन तलब दिने तयारी गरेका छौँ। पाँच जना खेलाडीलाई नेपाल क्रिकेट संघले दिने बताएको छ। अन्य १० जनालाई प्रादेशिक क्रिकेट संघले दिन्छ। असोजकै महिनाबाट १५ हजार रुपैयाँ तलब दिने हाम्रो योजना छ।’