निर्वाचनको सम्मुखमा सरकारले कसको उक्साहटमा विप्लव समूहका नेताहरुलाई पूर्जी जारी गर्यो ?

१९ साउन, काठमाडौं । कुनै बेलाको प्रतिबन्धित विप्लव समूहका नेता नेत्रविक्रम चन्दसहितलाई सरकारले ३५ दिने सूचना जारी गरेर फेरी पनि हिंसा भड्काउने प्रयासमा लागेको छ । तत्कालिन नेकपा माओवादी केन्द्रबाट विभाजित भएर संसदीय व्यवस्थाका विरुद्ध ‘एकीकृत जनक्रान्ति’ भन्दै केही वर्ष भूमिगत भएर शान्ति प्रकृयामा आएको दुई वर्षपछि सरकारले ३५ दिने पूर्जी जारी गरेपछि निर्वाचनको सम्मुखमा हिंसा भड्काउने प्रयासमा लागेको हो ।

२०७७ साल फागुन २० गते तत्कालीन सरकारसँग तीन बुँदे सहमतिमार्फत शान्तिपूर्ण राजनीतिमा फर्किएको नेत्रविक्रम चन्द विप्लव नेतृत्वको नेकपाका शीर्ष नेताविरुद्ध ‘वारेन्ट’ जारी भएसँगै निर्वाचनको मिति घोषणाको सम्मुखमा शंका उत्पन्न भएको छ । सरकारसँगको सहमतिअनुसार जेलमा रहेका कार्यकर्ता छुटाउन नेताहरु दौडधुपमा रहेकै बेला ललितपुर जिल्ला अदालतले सोमबार महासचिव विप्लव, प्रवक्ता खड्गबहादुर विश्वकर्मा प्रकाण्डसहितका नेता–कार्यकर्ताविरुद्ध विभिन्न कसूरमा ३५ दिने पूर्जी जारी गर्यो । जसले गर्दा विप्लवहरुलाई पनि सरकारको गतिविधिले झट्का दिएको छ ।