डेंगुको उपचारमा मेवाको पात

नेपाल अहिले संक्रामक रोग डेंगुको प्रकोपबाट गुज्रिरहेको छ । काठमाडौं उपत्यकाभित्र घरैपिच्छे जस्तो डेंगु रोगी छन् । उपत्यकाबाहिर जिल्लाहरुमा पनि ग्रामीण स्तरसम्म डेंगुको संक्रमण फैलिसकेको देखिन्छ । आधुनिक चिकित्सा विज्ञानमा यस रोगको कुनै खास औषधि भने छैन । अस्पताल र डाक्टरहरुले यस रोगका रोगीहरुमा गरिरहेको भनेको लाक्षणिक चिकित्सा मात्र हो । सामान्यतः यो रोग एक हप्तामा आफैँ निको भएर जाने हुन्छ ।

एडिस एजेप्टी नामक पोथी लामखुट्टेको टोकाइबाट सर्ने डेंगु संक्रामक रोग हो । उक्त जातको पोथी लामखुट्टेले मानिसलाई टोकेर विषाणु (भाइरस) सार्ने गर्छ । यो रोग लागिसकेपछि कसरी ठीक गर्ने भन्ने विषय आम चासोकोे विषय हुन्छ । त्यस अतिरिक्त यस रोगको अन्य विषय आमरुपमा जनस्वास्थ्यको विषय हुँदैन । डेंगु रोग वृद्धवृद्धा र बालबालिकाको लागि बढी घातक मानिन्छ ।