बिहीवारदेखि काठमाडौंमा अहिंसा महोत्सव, प्रवेश निःशुल्क

काठमाडौं– नेपाल शाकाहारी संघले आयोजना गर्ने ‘अहिंसा महोत्सव नेपाल’ को तयारी पूरा भएको छ । महोत्सव नेपाल प्रहरी क्लब प्रदर्शनीमार्ग, भृकुटीमण्डपमा यही भदौ १२ गते बिहीवारदेखि भदौ १४ गते शनिवारसम्म आयोजना सञ्चालन हुनेछ ।

‘करुणाले जोड्छ’ भन्ने मुल नारासहित सम्पन्न हुन लागेको महोत्सवमा सबैका लागि निःशुल्क प्रवेशको व्यवस्था गरिएको आयोजक संस्थाले जनाएको छ ।

पशु–पंक्षी प्रेम, मानव स्वास्थ्यको ख्याल गर्ने तथा पृथ्वी–वातावरणको हितका लागि ‘पूर्ण शाकाहारी’ जीवनशैली प्रवर्धन यो कार्यक्रमको मुख्य उदेश्य बताइएको छ ।

महोत्सवले अहिंसाका मूल्य र शाकाहारी जीवनशैलीमा रुचि राख्ने पशुमुक्ति अभियन्ता, विभिन्न संघसंस्था र समुदायलाई जोड्ने अपेक्षा राखेको छ । कार्यक्रमका प्रमुख आकर्षणमा दिगो जीवन पद्धति, शाकाहारी जीवनशैली र पशु अधिकारसम्बन्धी अन्तरक्रिया रहने नेपाल शाकाहारी संघका अध्यक्ष कृष्ण गुरुङले जानकारी दिए ।

त्यस्तै, कार्यक्रममा भरतनाट्यम नृत्यलगायत सांगीतिक प्रस्तुति, योग सत्र, देशविदेशका अभियन्तासँग प्रत्यक्ष भेटघाट र अनुभव आदानप्रदान, शाकाहारी परिकार तथा पकाउने विधिको प्रदर्शन र विशेष रात्रिभोज रहने छन् । महोत्सवमा पूर्ण शाकाहारी खानाहरूको समेत स्टल रहनेछन् ।

महोत्सवमा ५० हजारभन्दा बढी दर्शकको उपस्थिति रहने आयोजकको अनुमान रहेको छ । त्यस्तै, महोत्सवमा खाना लगायत शाकाहारी उत्पादनका ६० भन्दा बढी कक्ष, ४० भन्दा बढी वक्ता र २० भन्दा बढी सहभागी संस्था रहनेछन् । जसमा अन्तर्राष्ट्रिय वक्ताहरूसमेत रहनेछन्। संघले २०७४ सालमा पनि काठमाडौँमा ३५ भन्दा बढी अन्तर्राष्ट्रिय प्रतिनिधिको सहभागितामा आठौँ एसिया–प्यासिफिक भेजिटेरियन कांग्रेस (एपिभिसी) सफलतापूर्वक आयोजना गरेको थियो ।

शाकाहार र अहिंसा प्रवर्धनको क्षेत्रमा शाकाहारी संघ झन्डै दुई दशकयता नेपालभित्र अनेकन् गतिविधिमा क्रियाशील रहेको छ। कार्यक्रमको सह–आयोजकमा काठमाडौं एनिमल सेभ मुभमेन्ट, समस्त महाजन, श्रीकृष्ण प्रणामी समाज र वल्र्ड भिजन अर्गनाइजेसन रहेका छन्। कार्यक्रम प्रायोजकमा वर्ल्ड भेगन भिजन र म्याजिक मार्बल फाउन्डेसन रहेका छन् ।