देशभर मध्यमदेखि भारी वर्षा, १९ स्थानमा ‘अति भारी वर्षा’

काठमाडौं । दुई दिनदेखि देशका विभिन्न ठाउँमा निरन्तर मध्यमदेखि ‘अति भारी वर्षा’ भएको छ । केही दिनदेखि मनसुनी प्रणाली थप सक्रिय भएसँगै देशभर निरन्तर वर्षा भइरहेको मौसम पूर्वानुमान महाशाखाले जनाएको छ । विगत २४ घण्टामा देशका १५ स्थानमा ‘अति भारी वर्षा’ भएको महाशाखाले जनाएको छ ।

मौसम महाशाखाले दिएको विवरणअनुसार २४ घण्टामा सबैभन्दा बढी पाल्पाको कमलगाउँमा ३ सय ९७ दशमलव ४ मिलिमिटर वर्षा भएको छ भने दाङका मात्रै ५ ठाउँमा अति भारी वर्षा भएको देखिएको छ । मौसमविद् रञ्जन शर्माका अनुसार सामान्यतया २ सय मिलिमिटर नाघेमा अति भारी वर्षा भन्ने गरिन्छ । तर, अहिलेको यो मनसुनी सिजनमा झन्डै ४ सय मिलिमिटर वर्षा पुग्ने संकेत देखिएको छ । ‘मनसुनी प्रणाली थप सक्रिय भएमा देशको केही स्थानमा ४ सय मिलिमिटरभन्दा बढी वर्षा हुने देखिन्छ, शर्माले भने, शुक्रबारदेखि शनिबारसम्म देशभर भइरहेको वर्षाले क्षति तथा जनजीवन थप प्रभावित हुने देखिन्छ ।’