सेनाले ३२ जिल्लाका ब्यारेकको लागि डीडीसीसँग दैनिक १० हजार लिटर दूध किन्ने

काठमाडौं । सरकारी स्वामित्वको दुग्ध विकास संस्थान (डीडीसी)ले आफ्ना उत्पादनको बजार विस्तारसँगै किसानबाट दूध खरिद बढाउने अवसर पाएको छ । नेपाली सेनासँग भएको नयाँ सम्झौताले डीडीसीका लागि ठूलो परिमाणको नियमित संस्थागत बजार सुनिश्चित गरेपछि दूध संकलन विस्तारको बाटो खुलेको हो ।

सम्झौताअनुसार नेपाली सेनाले मुलुकका ३२ जिल्लामा रहेका आफ्ना ब्यारेकका लागि डीडीसीबाट दैनिक १० हजार २५१ लिटर प्रशोधित दूध खरिद गर्नेछ । ठूलो परिमाणमा दैनिक खपत हुने सुनिश्चित भएपछि डीडीसीलाई उत्पादन तथा आपूर्ति व्यवस्थापन गर्न सहज हुने अपेक्षा गरिएको छ ।