दसैँअघि नै सञ्चालनमा ल्याउने तयारीमा मालढुङ्गा पुल

काठमाडौं – असोज ११ गते कालीगण्डकी नदीमा आएको बाढीबाट क्षतिग्रस्त बागलुङ–पर्वत जोड्ने मालढुङ्गा पुललाई आगामी बडादसैँअघि नै सञ्चालनमा ल्याउने गरी मर्मतको काम तीव्र पारिएको छ । सडक डिभिजन कार्यालय पोखराले पुलमा २४सै घण्टा काम भइरहेको जनाएको छ ।

बाढीका कारण एक सय १४ मिटर लामो पुलको पहुँचमार्गतर्फ करिब ३० मिटर सडकमा क्षति पुगेपछि बागलुङ र पर्वतबीचको नियमित आवागमन प्रभावित भएको थियो । सुरुमा दुई जिल्लाबीचको सडक सम्पर्क नै विच्छेद भए पनि अहिले वैकल्पिक मार्गबाट सवारीसाधन सञ्चालन भइरहेका छन् ।