राजदूत सुनुवाइको उजुरीमा तानिए सांसद सुनार, प्रहरीको बढुवादेखि सांसद बनाउनसम्म करौडौं रकम उठाएको आरोप

काठमाडौं । साउदी अरेबियाका लागि प्रस्तावित नेपाली राजदूत गिरीबहादुर सुनारको नाममाथि संसदीय सुनुवाइ समितिमा परेको उजुरीले राजनीतिक वृत्तमा गम्भिर प्रश्न खडा गरेको छ। आर्थिक लेनदेनदेखि राजनीतिक प्रभाव, प्रहरीको उच्च तहको बढुवामा रकमको चलखेल र अदालतमा पेस भएको प्रमाण प्रभावित पार्न खोजिएको दाबीसम्मका विषय उजुरीमा उठाइएका छन्।

सरकारले असोज २ गते १३ देशका लागि राजदूत सिफारिस गरेको थियो। त्यसपछि संसदीय सुनुवाइ समितिले सार्वजनिक उजुरी आह्वान गरेको थियो। समितिमा प्रस्तावित राजदूतहरूविरुद्ध सातवटा उजुरी परेकोमा गिरीबहादुर सुनारविरुद्ध मात्रै दुईवटा उजुरी परेको सार्वजनिक विवरण छ।