पर्यटकको पर्खाइमा ऐतिहासिक उदयपुरगढी

उदयपुर । कुनै समय युद्धको मोर्चा, सैनिक बङ्कर र सुरक्षा संयन्त्रले भरिएको ऐतिहासिक उदयपुरगढी यतिबेला नयाँ स्वरूपमा सजिएर पर्यटकको पर्खाइमा छ । दुई सय ५० वर्ष भन्दा पुरानो भग्नावशेषलाई पुनर्जीवन दिँदै उदयपुरगढी गाउँपालिकाले पुनर्निर्माण गरेपछि ऐतिहासिक गढीले आङ्खनो मौलिक स्वरूपको झल्को दिन थालेको हो ।

उदयपुरको पुरानो सदरमुकाम समेत रहेको उदयपुरगढी गाउँपालिका–५ मा अवस्थित यो गढी नेपालको एकीकरणकालीन इतिहाससँग जोडिएको महत्वपूर्ण स्थल हो । गाउँपालिकाको वर्तमान केन्द्रबाट करिब एक किलोमिटर उत्तरमा रहेको गढीलाई पर्यटकीय गन्तव्यका रूपमा विकास गर्ने उद्देश्यले पुनर्निर्माण गरिएको हो । पुनर्निर्माणसँगै गढी अहिले आन्तरिक तथा बाह्य पर्यटकलाई आकर्षित गर्ने सम्भावनायुक्त ऐतिहासिक स्थल बनेको छ ।