जनमत पार्टीद्वारा प्रधानमन्त्रीसमक्ष ११ बुँदे मागपत्र पेश, संघीय संरचना र समावेशितामा जोड

काठमाडौँ - डा.सिके राउत नेतृत्वको जनमत पार्टीले संघीय संरचना, समावेशिता तथा क्षेत्रीय मुद्दासम्बन्धी विषयहरू समेटिएको ११ बुँदे मागपत्र प्रधानमन्त्रीसमक्ष पेश गरेको छ।

काठमाडौँको माइतीघर मण्डलामा प्रदर्शनपछि पार्टीका प्रतिनिधिहरू प्रधानमन्त्री तथा मन्त्रिपरिषद्को कार्यालय सिंहदरबार पुगेर मागपत्र बुझाएका हुन्। सो क्रममा तराई-मधेशका विषय तथा नागरिकका जीविकोपार्जनसँग जोडिएका समस्यालाई प्राथमिकतामा राख्न सरकारको ध्यानाकर्षण गराइएको पार्टीले जनाएको छ।

मागपत्रमा विगतमा भएका सम्झौता कार्यान्वयन गर्नुपर्ने, राज्यका सुरक्षा निकायहरूमा समावेशिता सुनिश्चित गर्नुपर्ने तथा प्रदेशलाई पूर्ण स्वायत्त संरचनाको रूपमा विकास गर्नुपर्ने विषयहरू समेटिएका छन्। साथै प्रहरी प्रशासनलाई प्रदेश सरकारको मातहतमा राख्ने व्यवस्था गर्नुपर्ने माग पनि अघि सारिएको छ।

त्यसैगरी निर्वाचन क्षेत्र पुनः निर्धारण गर्नुपर्ने तथा प्रदेश सीमांकनमा आवश्यक सुधार गर्नुपर्ने विषयलाई पनि प्रमुख एजेन्डाका रूपमा प्रस्तुत गरिएको छ। पार्टीले यी विषयहरू दीर्घकालीन संघीय व्यवस्थापन र क्षेत्रीय सन्तुलनका लागि आवश्यक रहेको दाबी गरेको छ।