गोलभेडा किसानको, भाउ विचौलियाको

मूल्यअनुसार किसानको वर्षभरिको मेहनत र लगानी पनि नउठ्ने भएपछि बाध्य भएर गोलभेँडा फ्याँकिएको हो। एक वर्षकै अन्तरमा ७८ प्रतिशतले थोक मूल्य घटाइएको छ।

देशमा माग भएको गोलभेँडा स्वदेशी उत्पादनले थेग्दैन। माग धान्नकै लागि गोलभेँडा भारतबाट आयात गरिन्छ। भन्सार विभागका अनुसार चालू आर्थिक वर्षको पहिलो १० महिनामा ५५ करोडको गोलभेँडा भारतबाट आयात भएको छ। तर, देशमा किसानको मर्का ठीक उल्टो छ। उचित मूल्य नपाएका कारण किसानले लाखौं रुपैयाँको गोलभेंडा खेर फाल्नुपर्ने बाध्यता छ। किसानबाट उपभोक्ताको हातमा पुग्दासम्म गोलभेँडाको मूल्य आकाश–जमिनको फरक परिसकेको हुन्छ। शनिबार गोलभेँडाको थोक मूल्य प्रतिकिलो १२ रुपैयाँ थियो। आइतबार एकाएक ६ रुपैयाँ निर्धारण गरेपछि कालीमाटी फलफूल तथा तरकारी बजार विकास समितिको सडकमा गोलभेँडा फ्याँकेर किसानले सरकारको ध्यानाकर्षण गराए।