बझाङ–बनलेक ४०० केभी प्रसारण लाइन निर्माण प्रक्रिया अघि बढ्यो

काठमाडौं। बझाङदेखि डोटीको बनलेक (पश्चिम सेती) जोड्ने ४०० केभी क्षमताको प्रसारण लाइन निर्माण प्रक्रिया अघि बढाइएको छ। करिब २ हजार ५०० मेगावाट बराबरको विद्युत् प्रवाह गर्ने लक्ष्यसहित प्रस्ताव गरिएको उक्त आयोजना निर्माणका लागि आवश्यक अनुमति प्रक्रिया सुरु गरिएको हो।

राष्ट्रिय प्रसारण ग्रिड कम्पनी लिमिटेडले प्रसारण लाइन निर्माणका लागि विद्युत् विकास विभागमा आवेदन दिएको छ। विद्युत् ऐन, २०४९ को व्यवस्थाअनुसार आयोजनाको विवरणसहित अनुमतिका लागि आवेदन दिइएको हो।