मेयरको लापरबाहीले १ करोड ९५ लाख ८८ हजार राजस्व घाटा

भद्रपुर । ठेकेदार कम्पनीले भण्डारण गरेको अनुमानित २ करोड मूल्य बराबरको ढुङ्गागिट्टी नगरपालिकाले बिक्री गर्न अनुमति दिएको छ । गत आर्थिक वर्ष २०७८÷०७९ मा ठेकेदारले जम्मा गरेको नदीजन्य सामग्री झापा मेचीनगर नगरपालिकाले जफत गरेर आम्दानी देखाउनुपर्नेमा उल्टै बिक्री गर्न अनुमति दिएको हो ।

नगरपालिकाले जफत गरी लिलाम गर्नुपर्ने भण्डारण (स्टक) गरेको ढुङ्गागिट्टीलाई गैरकानुनी रूपमा ठेकेदारका पक्षमा निर्णय गरी नगरप्रमुख गोपालचन्द्र बुढाथोकीले स्टक प्रमाणित गरेको पत्रमा हस्ताक्षर गरेर १ करोड ९९ लाख ७६ हजार ४७ रुपियाँ बराबरको ढुङ्गागिट्टी ठेकेदार कम्पनीलाई बिक्री गर्न अनुमति दिनुभएको हो । लिलाम नगरेपछि उक्त भण्डारणबाट नगरपालिकालाई ३ लाख ८७ हजार ६ सय ९० रुपियाँ नगरको राजस्व जम्मा भएको छ । मेचीनगरमा ठेकेदारहरूले विभिन्न स्थानमा भण्डारण गरिराखेको ३३ लाख २९ हजार ६ सय २४ क्युफिट ढुङ्गागिट्टीलाई कानुनविपरीत स्टक प्रमाणित गरिदिएर नगरप्रमुख बुढाथोकीले ठेकेदारलाई बिक्री गर्ने बाटो खोलिदिएका छन् ।