कर्णालीमा डाक्टर फलाउने अभियान : पहिलो मेडिकल इन्टर्नसिप ब्याचको ऐतिहासिक यात्रा

कलकल बग्ने तिला नदीको सुसेली, जुगाड खोलाको किनार, राराको स्वच्छ हावा, काञ्जिरोवा हिमालको काख तथा चन्दननाथ बाबाको आशीर्वादले पावन बनेको जुम्लाको ऐतिहासिक भूमिमा पहिलोपटक सेतो कोट पहिरिएका ती कलिला विद्यार्थीहरू कर्णाली स्वास्थ्य विज्ञान प्रतिष्ठान (KAHS), जुम्लामा मेडिकल इन्टर्नसिपको ऐतिहासिक यात्रामा अघि बढेका छन्। भोलिका दिनमा उनीहरू दक्ष चिकित्सकका रूपमा देश–विदेशका विभिन्न स्थानमा सेवा दिँदै समग्र कर्णाली र राष्ट्रकै लागि एउटा युगान्तकारी उपलब्धिको आधार बन्नेछन्।

कडा मेहनत, त्याग र समर्पणका साथ चिकित्सा शिक्षा आयोगको प्रवेश परीक्षा उत्तीर्ण गरी सहरका सुविधासम्पन्न शिक्षालयहरू छाडेर जुम्ला आएका हाम्रा प्रिय विद्यार्थीहरूले आज आफ्नो सपनाको एउटा महत्त्वपूर्ण खुड्किलो पार गरेका छन्। उनीहरू केवल डाक्टर मात्र बनेका छैनन्; उनीहरू देश–विदेशका अस्पताल, शैक्षिक संस्थान र समुदायमा पुगेर गुणस्तरीय स्वास्थ्य सेवा प्रदान गर्दै प्रतिष्ठानको गौरव अझ उँचो बनाउनेछन्।