सन् २०३० सम्ममा विद्युतीय कार १० गुणा बढ्ने अनुमान

न्यूयोर्क । सन् २०३० सम्म पुग्दा संसार निकै फेरिसक्नेछ । अहिले विश्वभरका सडकमा जति विद्युतीय कार गुडिरहेका छन् सन् २०३० मा सोको १० गुणा पुग्नेछ । अन्तरराष्ट्रिय ऊर्जा निकाय (आईईए)ले मंगलबार यस्तो बताएको हो । आईईएले सार्वजनिक गरेको ‘वल्र्ड इनर्जी आउटलुक २०२३’का अनुसार सो अवधिसम्ममा विश्वमा उपलब्ध हुने कूल विद्युतमा नवीकरणीय बिजुलीको अनुपात ५० प्रतिशत पुग्नेछ । यो अनुपात अहिले ३० प्रतिशत छ ।

‘विश्वभर नै स्वच्छ ऊर्जामा व्यापक परिवर्तन भइरहेको छ र यो परिवर्तन रोकेर रोकिन्न । प्रश्न यो हुन्छ कि हुन्न भन्ने नै होइन । कति छिटो भन्ने मात्रै हो । यो परिवर्तन जति छिटै हुन्छ त्यति नै हामी सबैका लागि उत्तम हो,’ आईईएका कार्यकारी निर्देशक फाती बिरोलले भने ।