स्वामीकार्तिक खापरका बालबालिका र आमामा कुपोषण

बाजुरा । सुलभ स्वास्थ्य, शिक्षा तथा गासावास आवासको सनिश्चितताबारे नेपालको संविधानले व्यवस्था गरेको छ । विकास सूचकाङ्कमा ७७औं स्थानमा रहेको बाजुराली नागरिक भने अकाल रोग, भोक र शोकले ग्रसित छन् । विशेषगरी पोषणयुक्त खाद्यसुरक्षा व्यवस्थापन नहुँदा सत्केरी आमा र नवजात शिशुले अकालमा ज्यान गुमाउनु परेको कारुणिक व्यथा बाजुरेलीसामु छ । यस्तै, ज्वलन्त उदाहरण बाजुराको स्वामीकार्तिक खापर गाउँपालिका–१ मुक्तिकोटका आठ बालबालिकाले ज्यान गुमाउनुपरेको छ । कुपोषण कहरका रूपमा चिनिने बाजुराको स्वामीकार्तिक खापर गाउँपालिका–१ मुक्तिकोट गाउँमा २०७९ सालमा ८ जना बालबालिकाको मृत्यु भएको छ । सधैंका वर्षमा कुपोषणले यो गाउँमा बालबालिकाको मृत्यु हुने गरेको छ । गत वर्षमा पनि ८ जनाको मृत्यु भएको अनमी जानकी न्यौपानेले बताउनुभएको छ ।

स्थानीय जानकी विकको ३ वर्षको छोरा टीका विक, शान्ति विकको ४ वर्षको छोरा प्रकाश विकको मृत्यु भएको हो । त्यस्तै, मदन विककी १२ दिनकी छोरी, मुना विकको १३ दिनको छोरा र बाटुली विकको २१ दिनको छोराको मृत्यु भएको स्वास्थ्यकर्मीले बताएका छन् । त्यस्तै, जीवना विककी १ महिनाकी छोरी, रिना विकको ४ महिनाको छोरा र फुङ्गली विकको ५ महिनाकी छोरीको मृत्यु भएको छ । बच्चाहरूको मृत्यु भइसकेको छ, आमा भने कडा कुपोषणको शिकारमा रहेका छन् ।