दुर्गमका अस्पतालमा प्रयोगशाला सेवा र एन्टिबायोटिक प्रतिरोध

त्रिवेणी–६ की २२ वर्षीया एक सुत्केरी महिला प्रसूति भएको करिब एक महिनापछि दायाँ स्तनमा अत्यधिक दुखाइ, सुन्निने र १०३.८°F सम्मको उच्च ज्वरो आएपछि जिल्ला अस्पताल बाजुरामा भर्ना हुनुभयो। प्रयोगशाला परीक्षण गर्दा उहाँको सेतो रक्तकोष (टीएलसी) ३०,५००/मिमी³ पुगेको थियो, जुन गम्भीर संक्रमणको संकेत गर्ने अवस्था थियो।

हाम्रो चिकित्सकीय टोलीको परीक्षणपछि उहाँलाई स्तनमा पिप जमेको संक्रमण अर्थात् स्तनको फोका भएको पुष्टि भयो। अस्पतालको चिकित्सकीय टोलीले तत्काल सामान्य शल्यक्रिया गरी स्तनमा जमेको करिब २००–३०० मिलिलिटर पिप निकालेको थियो। त्यसपछि उहाँलाई आवश्यक एन्टिबायोटिकसहित अस्पतालमै भर्ना गरेर उपचार अघि बढाइयो।