चार दिनपछि कुनौटामा खुल्यो बेनी–जोमसोम–कोरला सडकको नयाँ ट्र्याक

असोज ८ देखि ११ गतेसम्म परेको अविरल वर्षापछि कालीगण्डकी नदीमा आएको बाढीले सडक कटान गरेर बगाएको बेनी–जोमसोम–कोरला सडकअन्तर्गत म्याग्दीको रघुगङ्गा गाउँपालिका–२ कुनौटामा चार दिनको निरन्तर प्रयासपछि नयाँ ट्र्याक खोलिएको छ।

चारवटा ठुला एक्साभेटर र टिपर परिचालन गरी दुवैतर्फबाट काम गरेपछि करिब २५० मिटर सडक कटान भएको स्थानमा नयाँ ट्र्याक खोल्न सफल भएको बेनी–जोमसोम–कोरला सडक आयोजनाका प्रमुख तेजस्वी शर्माले बताउनुभयो। कालीगण्डकी नदीले कटान गरेर क्षतिग्रस्त बनाएको यस स्थानमा सडकको मार्ग खोल्नु सबैभन्दा चुनौतीपूर्ण रहेको उहाँले बताउनुभयो।