लाखौंका प्रिय ‘खान सर’ किन एकाएक बने विवादित ? फरार रहेपछि खोज्दै प्रहरी

काठमाडौं । भारतका चर्चित शिक्षक तथा युट्युबर ‘खान सर’ यतिबेला पटनास्थित आफ्नो कोचिङ इन्स्टिच्युटमा भएको एउटा हिंसात्मक विवादका कारण ठुलो कानुनी संकटमा फसेका छन् । सस्तो शुल्कमा धेरै विद्यार्थी पढाएर चर्चामा आएका खान सरमाथि आफ्ना सुरक्षाकर्मीहरूलाई गोली चलाउन उक्साएको आरोपमा पटना पुलिसले ‘ज्यान मार्ने उद्योग’अन्तर्गत मुद्दा दर्ता गरेको हो ।

घटनाको सुरुवात गत जुन २ मा भएको थियो, जब पटनाको मुसल्लहपुर हाट क्षेत्रमा रहेको खान सरको कोचिङ सेन्टर ‘खान ग्लोबल स्टडिज’मा १५ देखि २० जनाको समूहले अचानक तोडफोड र ढुङ्गामुढा गर्‍यो । उक्त आक्रमणमा खान सरको इन्स्टिच्युटका एक सुरक्षाकर्मी गम्भीर घाइते भएका थिए । खान सरले सोही क्षेत्रमा रहेका प्रतिस्पर्धी कोचिङ सेन्टरका सञ्चालकहरूले व्यापारिक रिसिबीका कारण आफूमाथि आक्रमण गराएको आरोप लगाएका थिए । उनको आरोप अनुसार आफूले निकै कम शुल्कमा गुणस्तरीय शिक्षा दिएर धेरै नतिजा निकालेकाले अन्य इन्स्टिच्युटहरू उनीसँग रुष्ट थिए ।