कृषि यान्त्रिकीकरणमा जोड, किसानलाई मिनी टिलरदेखि प्लास्टिक टनेलसम्म

उदयपुर । उदयपुरको चौदण्डीगढी नगरपालिकाले कृषि उत्पादनमा बृद्धि, लागत न्यूनीकरण र कृषिको आधुनिकीकरणलाई प्राथमिकता दिँदै किसानलाई कृषि सामग्री वितरण गरेको छ । नगरपालिकाले ५० प्रतिशत लागत सहभागितामा १४ जना किसानलाई हाते ट्र्याक्टर (मिनी टिलर), २५ जनालाई मल्चिङ प्लास्टिक तथा १०२ जना किसानलाई १४७ वटा प्लास्टिक टनेल वितरण गरेको हो ।

नगर प्रमुख कालुमान लामाले कृषि सामग्री वितरण गरिएको हो । व्यक्तिगत किसानसँगै कृषि समूह, कृषि फर्म र कृषि सहकारीलाई समेत सामग्री उपलब्ध गराइएको नगरपालिकाले जनाएको छ । परम्परागत कृषि प्रणालीलाई क्रमशः यान्त्रिक र व्यावसायिक बनाउँदै उत्पादन तथा उत्पादकत्व बृद्धि गर्ने उद्देश्यले कृषि सामग्री वितरण गरिएको नगर प्रमुख लामाको भनाइ छ ।