पूर्व-पश्चिम रेलमार्गमा ३४ अर्ब २२ करोड खर्च, प्रगति कति ?

काठमाडौं– पूर्व-पश्चिम रेलमार्ग निर्माण सरकारको राष्ट्रिय गौरवको आयोजना हो । तर यसको काम र प्रगति हेर्दा गौरव गर्न लायक छैन । आर्थिक वर्ष २०६५/६६ देखि रेलमार्ग निर्माणको काम थालेको भए पनि चालू आर्थिक वर्षसम्म के कति प्रगति भयो भन्ने यथार्थ तथ्यांक छैन ।

पूर्वको काँकडभिट्टादेखि पश्चिमको गड्डाचौकीसम्म ९२४.९४ किलोमिटर रेलमार्ग निर्माण गर्ने लक्ष्यसहित हालसम्म ३४ अर्ब २२ करोड खर्च भइसकेको छ । रेलमार्ग निर्माणको लागि सिभिल ठेक्का, परामर्श सेवा र मुआब्जा वितरणमा उक्त रकम खर्च भएको बताइन्छ । गत वर्ष सरकारले यस आयोजनातर्फ ७७ करोड रुपैयाँ खर्च गरेको थियो ।